Yuvak
Agar aapke pas bhi yuvako ke liye kuch message he to hame bhej de.
Adhik jankari ke liye sub-page "Sampark" dekhe.
Andha mange ak aakh Khuda de do
Me jab bible school me tha tab ki ye baat he; Us waqt hame subah nashte me har roj alag alag khana milta tha. usme 2 ya 3 din chay ke sath 2 roti milti thi. Bahut se chatro ka us 2 roti se kuch nahi hota tha; kuch chatro ke to pet ke konse kone me wo rotiya chali gayi ye bhi pata nahi chal pata tha. Mera ak dost tha wo bhi isme shamil hota he. Ak din jab use bahut joro se bhuk lagi hui thi aur usne subah nashte ke pahle Parmeshwar se kaha, Prabhu aaj muje jyada roti do. Fir bad me jab ham sab nashta karne ke liye baithe tab use kisi ne apni ak roti de di aur itna hi nahi balki use pure 3 rotiya jyada mili. Hallelujah! Us din bahut se chatro ka upvas tha aur unhone apni rotiya baant di. Mere dost ne Parmeshwar se keval ak roti jyada milne ki apeksha ki thi par use Parmeshwar ne pure 3 rotiya jyada di aur usne pet bhar ke nashta kiya. Shayad esiliye kahte he, Andha mange ak aakh Khuda de do!
Ji ha, mere priy javan dosto Parmeshwar ka swabhav hi aisa he; wo hame kabhi kuch kam nahi deta balki hamari apeksha se adhik denewala wo Parmeshwar he. Ham hi murkh he jo us Sarv Samarth Parmeshwar se kam ki tamanna karte he. Ham aksar ye bhul jate ki Parmeshwar bahut bada he aur usi ne ye itni badi srushti banai he; is jag me jo kuch bhi he usne hi banaya he. Aur vaise bhi usse konsi bhi baat namumkin nahi. Fir kyu ham khwab to bade bade dekhte he par us Parmeshwar se choti choti aur thode ki hi tamanna karte he? Kyu ham apni prarthana me Prabhu aisa to bhi kar....., Prabhu itna to bhi kar....., Jesus kam se kam ye to bhi kar.... in jaise kai sare shabdo ka istemaal karte he? kisi ke pas uski jitni dene ki ahimiyat he keval utna hi mange; jyada na mange, ye baat sach he; par Parmeshwar ke vishay me kya...? uske pas hame acchi chije mangne par koi maryada nahi he. Parmeshwar hame sabkuch deta he. Kisi ne Parmeshwar se kuch manga aur Parmeshwar ne use nahi diya aisa kabhi hota nahi he; kyu ki Parmeshwar koi manushy nahi he, jo bhi Parmeshwar se mangta he Parmeshwar use avashya deta he. bas mangte samay keval ham itna dyan rakhe ki jo bhi ham mangte he wo Parmeshwar ki eccha ke mutabik ho (1Yuhanna 5:14,15).
Sabse mahatvpurn baat ye he ki hamara Parmeshwar par pura bharosa chahiye aur jis prakar wo use prapt karne ke liye kahta he usi prakar ham wo prapt kare. Is samay ham Bible se ak addyay dekhenge - Luka 5:1-10. Yaha ham padhte he ki, shamoun patras ne jab Yeshu ki baat mani tab use uski apeksha se jyada machliya prapt hui. Hua aise ki, ak din Yeshu gannesarat ki zeel ke kinare pe khada logo ko Parmeshwar ka vachan suna raha tha. Bhid ke sath log use sun rahe the. Tab Yeshu ne zeel ke kinare lagi hui do naave dekhi aur machuve unpar se utarkar jaal dho rahe the. Un do me se ak naav shamoun ki thi. Yeshu ne us naav par chadhkar use kinare se thoda hata le chalne ko kaha aur fir Yeshu Masih us par se sabko Updesh dene laga. Apni baate khatam hone par Yeshu ne shamoun se kaha, naav gahare pani me le chal aur fir machliya pakadne ke liye apna jaal dal. Yeshu ki baat sunkar shamoun ne usse kaha, "he Swami, ham ne sari raat mehnat ki aur kuch na pakda; taubhi tere kahne se jaal dalunga.” Jab shamoun ne aisa kiya to usne bahut sari machliya pakdi; itni ki uska jaal fatne laga. Shamoun ne apne sathiyo se jo dusri naav me the kaha ki, aao aur aakar hamari madat karo. Uske sathi vaha turant apni naav lekar aaye aur machliyose dono naave itni bhar gai ke naave dubne lagi. Ye sab dekhkar shamoun patras Yeshu ke pao par gira aur kaha, “He Prabhu, mere pas se ja kyu ki me papi manushy hu.” Parantu Yeshu ne shamoun se kaha, “Mat dar ab se tu manushy ko jivta pakda karega.”
Mere priy dosto, ye ghatna hamare liye ak jinda misal he ki Parmeshwar hame hamari tamannao se bhi adhik denewala Parmeshwar he. Patras ne aisa kya kiya tha ki use apeksha se adhik mila? keval Prabhu Yeshu par vishwas karke usne wo kiya jo Yeshu ne usse karne ko kaha. Jab Yeshu naav par chadkar logo ko updesh de raha tha tab patras bhi vaha tha aur wo sab sun raha tha. Usne suni hui baato ne hi use Yeshu par pura bharosa rakhne ke liye sahayata ki. Petras aur uske sathiyo ne puri raat mehnat kar machliya pakadne ki koshish ki thi par unke hath ak bhi machli nahi lagi thi; parantu Yeshu ne jab patras se kaha tab usne na keval Yeshu ki baat suni balki turant vaisa kiya bhi. Patras ko apeksha bhi nahi thi ki itni machliya hath lagegi; parantu uske vishwas ne hi use apeksha se adhik diya. Ham bhi jab pure dil se Yeshu par vishwas kar ke kuch tamanna rakhenge to Parmeshwar use jarur puri karega. Aaj shayad tumhe tumhari Padhai, Kariyar, Nokri, Shadi aur aisi kai baato ki chinta hogi. Tumne us bare me kuch tamannaye rakhi hogi. Me tumhe ye batana chahunga ki tum tumhari tamannao se bhi accha aur adhik pane ke liye Yeshu par pure dil se vishwas karo ki wo tumhare liye ye sab karega aur keval itna hi nahi balki uski aagyao ka palan bhi karo. Jab tum Parmeshwar se prarthana karoge to Parmeshwar tumhe batayega ki kab, kya aur kaise karna he; tab tak apne man se kuch na karo. Muze yakin he tum aisa karoge to Pavitr Aatma tumhe margdarshan karega aur uttejan dega.
To fir ab dosto, daro nahi aur nirash mat hona; balki tayari karo Parmeshwar se apni tamanno se bhi badhkar prapt karne ke liye; kyu ki Andha mange ak aakh Khuda de do!